Prej vitesh kultura dhe arti kanë qenë arsyeja që dy komunitetet të bisedojnë dhe të lidhen, u tha në debatin “Kulturë, lajmërohu!”.
Debati, i cili u mbajt të premten më 28 tetor në Prishtinë, u organizua nga OJQ Aktiv në kuadër të Projektit Manifesta 14 për Ballkanin Perëndimor, ka mbledhur regjisorë dhe aktorë të njohur. Në diskutimin për sfidat kulturore folën Andrej Nosov, drejtor teatri dhe themelues i Fondacionit Heartefakt, Enver Petrovci, aktor, regjisor dhe shkrimtar, dhe Aleksandar Gjingjiq, aktor.
Emra të njohur nga bota e teatrit dhe filmit nga Serbia dhe Kosova folën për aktivizmin kulturor, artin e angazhuar, bashkëpunimin lokal dhe rajonal, sfidat dhe perspektivat në fushën e kulturës. Nosov, Petrovci dhe Gjingjiq theksuan se bashkëpunimi në art ekziston, por se duhet bërë më shumë për afrimin e dy shoqërive.
Andrej Nosov tha se teatri është një hapësirë ku jeton e vërteta dhe se njerëzit nga fusha e kulturës bëjnë gjëra të përbashkëta.
“Gjithmonë do të ketë njerëz që janë kundër komunikimit. Mendoj se kultura dhe arti luajnë një rol të madh në formësimin e të menduarit kritik. Fakti që shqiptarët do të kenë mendim kritik dhe serbët jo, nuk mendoj se do të sjellë ndonjë gjë të mirë. Ne vazhdojmë të kemi të njëjtin problem. Ne e kalojmë jetën duke bindur njëri-tjetrin se jeta nuk është një pjatë e sheshtë”, thotë Nosov.
Nosov theksoi se njerëzit në Beograd do të donin të dinin se çfarë po ndodh në Prishtinë.
“Gjithmonë ka një tension për atë që do të ndodhë. Mendoj se të gjithë jemi të padukshëm në hapësirën publike”, ka shtuar ai.
I madhi i filmit Enver Petrovci theksoi se politika dhe kultura nuk duhet të përzihen.
“Një artist nuk duhet të jetë anëtar i një partie politike. Të nxjerrin nga ajo baltë që të të përdorin e të flakin. Nga viti 2000 e deri më sot nuk kam punuar asnjë projekt me një parti politike. Në kulturë, ne bëjmë dy hapa përpara dhe tre hapa prapa. Kultura duhet të jetë e para”, tha Petrovci.
Aktori Aleksandar Gjingjiq tregon se rruga e kulturës dhe e artit nuk ka dilemë.
“Nuk kishim dilemë se ku po shkonim. Publiku është audiencë, na pëlqen të eksplorojmë hapësira të ndryshme”, thotë ai.
Krijuesit e teatrit dhe kinematografisë nga Serbia dhe Kosova theksuan se arti ofron mundësi për lidhje, duke parashikuar se po vjen nje periudh i bashkëpunimit të madh në industrinë e filmit në mes të Kosovës dhe Serbisë, si dhe në të gjithë rajonin.
Manifesta, Bienalja Evropiane e Artit Bashkëkohor përpiqet të promovojë artet bashkëkohore si një forcë për ndryshime shoqërore dhe ekonomike. Bienalja nomade evropiane është mbajtur në Prishtinë nga 22 korriku deri më 30 tetor 2022, me synim të mbështesë qytetarët e Kosovës në ambicien e tyre për të rimarrë hapësirën publike dhe për të rishkruar të ardhmen e qytetit të tyre si një metropol i hapur në zemër të Ballkanit.
Ky aktivitet realizohet në kuadër të projektit Manifesta 14 Ballkani Perëndimor dhe bashkëfinancohet nga Bashkimi Evropian.
