Mitrovicë e Veriut, 27 shkurt 2025 – Në Qendrën e Energjisë Qytetare u mbajt një diskutim mbi situatën politike, prioritetet lokale dhe përfshirjen e komuniteteve në proceset e vendimmarrjes, me qëllim krijimin e një mjedisi më të qëndrueshëm në veri të Kosovës.
Diskutimi me temën “Periudha paszgjedhore: Mundësitë e reja në Mitrovicën e Veriut/Veriun e Kosovës” mblodhi përfaqësues të shoqërisë civile dhe anëtarë të komuniteteve lokale. Ky aktivitet u organizua në kuadër të projektit “E ardhmja e përbashkët – Ndërtimi i komuniteteve të qëndrueshme përmes kohezionit social dhe shkëmbimit ndëretnik/ndërfetar”, i cili po zbatohet nga organizatat Syri i Vizionit, Instituti Edutask dhe OJQ Aktiv, me mbështetjen e Fondit Global për Angazhim dhe Qëndrueshmëri të Komuniteteve (GCERF).
Gjatë diskutimit u analizua peizazhi i ri politik dhe ndikimi i zhvillimeve paszgjedhore në marrëdhëniet mes komuniteteve në Mitrovicën e Veriut dhe rajonin më të gjerë. U shqyrtuan sfidat kryesore me të cilat përballen komunitetet lokale, përfshirë pasojat e ndalimit të investimeve, stagnimin ekonomik dhe nevojën për të krijuar dialog në nivel lokal.
Gjithashtu, u theksuan shqetësimet e reja në fushën e sigurisë, si dhe rëndësia e forcimit të mekanizmave lokalë për ndërtimin e besimit, zhvillimin e strategjive për parandalimin e radikalizimit dhe ruajtjen e stabilitetit. Diskutimi përfshiu edhe shqetësimet në rritje lidhur me ngacmimin seksual, një çështje që kërkon trajtim të menjëhershëm dhe efikas.
Fuqizimi ekonomik u identifikua si një faktor kyç për përmirësimin e cilësisë së jetës, duke u bazuar në mbështetjen e bizneseve lokale, nismat për punësim dhe zhvillimin e aftësive profesionale.
Çështja e mbrojtjes së mjedisit u veçua gjithashtu si prioritet, veçanërisht në kontekstin e menaxhimit të ndotjes dhe mbetjeve, duke u shqyrtuar projekte potenciale që mund të ndihmojnë në zgjidhje më të qëndrueshme.
Në përfundim të takimit, pjesëmarrësit diskutuan për mundësitë e përmirësimit të bashkëpunimit dhe forcimit të partneriteteve mes aktorëve lokalë dhe ndërkombëtarë. U arrit në përfundimin se është e domosdoshme të forcohet më tej roli i shoqërisë civile në proceset e vendimmarrjes, duke u siguruar që prioritetet e komuniteteve lokale të njihen dhe adresohen si në nivel lokal, ashtu edhe qendror.
Kjo nismë është pjesë e përpjekjeve të vazhdueshme për forcimin e dialogut ndëretnik dhe ndërtimin e një mjedisi të qëndrueshëm dhe të begatë në veri të Kosovës.
