Diskutimi me temën “Gazetaria e përgjegjshme dhe solidariteti në mbrojtje të interesit publik”, organizuar nga OJQ Aktiv dhe AMPEK, u mbajt më 24 nëntor 2025 në Prishtinë. Ngjarja mblodhi gazetarë, redaktorë dhe përfaqësues të shoqërisë civile me synim forcimin e solidaritetit profesional dhe shqyrtimin e mekanizmave për mbrojtjen e gazetarëve nga presionet, dezinformatat dhe fushatat e diskreditimit.
U theksua se liritë mediale dhe raportimi i përgjegjshëm janë thelbësore për ruajtjen e proceseve demokratike, ndërsa bashkëpunimi ndërmjet komunitetit mediatik dhe shoqërisë civile është kyç në luftimin e përmbajtjeve joprofesionale dhe manipuluese që dëmtojnë interesin publik.
Pjesëmarrësit diskutuan për sfidat e gazetarisë së përgjegjshme, standardet profesionale dhe rolin e politikave redaktuese në ruajtjen e besimit të qytetarëve në media. U nënvizua nevoja për mbështetje më të fortë institucionale dhe kolegiale për gazetarët që përballen me kërcënime dhe presione.
Vëmendje e veçantë iu kushtua rolit të Këshillit të Mediave të Shkruara, kodeve etike dhe mekanizmave të ankesave, me përfundimin se është e domosdoshme zbatimi më konsekuent dhe forcimi i këtyre mekanizmave.
U trajtua edhe rëndësia e solidaritetit ndërmjet gazetarëve dhe shoqërisë civile si një nga mekanizmat kryesorë për mbrojtjen e profesionit. U theksuan shembuj të bashkëpunimit të suksesshëm që kanë kontribuar në zbardhjen e dezinformatave, mbrojtjen e individëve nga fushatat e stigmatizimit dhe forcimin e standardeve profesionale.
Në pjesën e diskutimit për mbështetjen publike dhe institucionale, u theksua nevoja për reagime më të shpejta nga shoqatat mediatike dhe institucionet përkatëse, si dhe për investime më të mëdha në edukimin medial të qytetarëve.
Ngjarja u përmbyll me miratimin e një seti të shkurtër rekomandimesh për përmirësimin e bashkëpunimit ndërmjet mediave dhe organizatave të shoqërisë civile, forcimin e standardeve profesionale dhe sigurimin e një ambienti të sigurt për punën e gazetarëve.
Ky takim përfaqëson një nga iniciativat e shumta që NVO Aktiv organizon vazhdimisht në Prishtinë dhe Beograd për të forcuar dialogun, shkëmbimin e informacionit dhe besimin ndërmjet komunitetit të gazetarëve dhe sektorit civil. Gjatë viteve të kaluara, janë mbajtur takime të shumta joformale, përfshirë brifingje me gazetarë nga redaksitë e Beogradit dhe media në gjuhën serbe dhe shqipe në Kosovë. Me këto aktivitete, OJQ Aktiv promovon gazetari të përgjegjshme, dialog të hapur dhe angazhim të përbashkët për interesin publik.
