Ndikimet politike, mediale dhe ekonomike të aktorëve të ndryshëm vazhdojnë të përcaktojnë fuqishëm realitetin e sigurisë në rajon – u konstatua në punëtorinë mbi ndikimin në siguri dhe stabilitet në Ballkanin Perëndimor, e mbajtur më 23 tetor 2025 në Qendrën për Energji Qytetare (CEC) në Mitrovicën e Veriut.
Diskutimi ishte i pasur dhe dinamik, me pjesëmarrës që shkëmbyen mendime mbi sfidat aktuale politike dhe të sigurisë në rajon, si dhe mundësitë për forcimin e bashkëpunimit rajonal, qëndrueshmërisë institucionale dhe qeverisjes transparente.
Gjatë debatit, u veçua tema e procesit të normalizimit të marrëdhënieve ndërmjet Kosovës dhe Serbisë, si dhe ndikimet përmes manipulimeve mediatike, dezinformimit dhe presioneve politike, që dëmtojnë dialogun dhe stabilitetin rajonal.
U theksua se për shkak të marrëdhënieve të tensionuara, ekziston nevoja në rritje për ndërmjetësim ndërkombëtar, veçanërisht për rinovimin e dialogut shoqëror dhe politik brenda procesit të Brukselit, gjë që do të krijonte bazë për përparim thelbësor dhe afatgjatë, me efekt pozitiv në stabilitetin më të gjerë rajonal.
U konkludua se nisma të tilla ndihmojnë në kuptimin më të mirë të sfidave bashkëkohore të sigurisë dhe në forcimin e qëndrueshmërisë demokratike, duke lidhur aktorët rajonalë dhe evropianë në punë të përbashkët për paqen dhe bashkëpunimin e qëndrueshëm.
Punëtoria ishte pjesë e projektit “Ndërtimi i ‘Botës Serbe’: Ndikimi i Serbisë në sigurinë dhe stabilitetin në Ballkanin Perëndimor”, që zbatohet nga organizata të shoqërisë civile nga rajoni dhe Evropa Qendrore me mbështetjen e Fondit Ndërkombëtar të Vishegradit.
Projekti, që zgjat nga qershori 2025 deri në mars 2026, përfshin partnerë nga Serbia, Kosova, Mali i Zi, Bosnja dhe Hercegovina, Polonia dhe Sllovakia, me OJQ Aktiv si bartës i aktiviteteve në Kosovë.
Ai do të rezultojë me publikimin e katër raporteve analitike, një policy brief përfundimtar me rekomandime, si dhe një tryezë të rrumbullakët në Pragë, ku do të prezantohen gjetjet përpara vendimmarrësve evropianë dhe rajonalë.